ABŞ-Aİ ticarət razılaşması təhlükə altındadır

İyul ayında ABŞ və Avropa İttifaqı arasında əldə olunmuş ticarət razılaşması təhlükə altındadır. Buna səbəb isə avadanlıq istehsalçılarının ABŞ-a ixrac edilən məhsullara tətbiq olunan yeni metal rüsumlarına görə narazılığının artmasıdır.

FinFly The Wall Street Journal (WSJ) nəşrinə istinadən verdiyi xəbərə görə, razılaşmanın əldə olunmasından cəmi iki ay sonra Avropadakı istehsalçılar ixraca mane olan yeni bürokratik əngəllərdən şikayətlənməyə başlayıblar. Bu isə razılaşmada dəyişiklik edilməsini və ABŞ-a ixracın dayandırılmasını gündəmə gətirir. WSJ yazır ki, bunun əsas səbəbi sabiq ABŞ prezidenti Donald Tramp administrasiyasının 50%-lik metal rüsumlarını daha da genişləndirərək, tərkibində polad və alüminium olan yüzlərlə əlavə məhsulu da bu siyahıya daxil etməsidir. Nəticədə, Avropalı istehsalçıların bir çoxu əvvəllər razılaşdırılmış 15%-lik rüsumlardan daha yüksək – 50%-ə çatan ödənişlərlə üzləşiblər.

“Məqalədə qeyd olunur ki, əvvəlcə ABŞ-ın polad və alüminiuma tətbiq etdiyi rüsumlar yalnız bu metalların özünü və əsasən vint kimi sadə metal hissələri əhatə edirdisə, indi isə bu rüsumlar mühərriklər, nasoslar, dəzgahlar və tikinti avadanlıqları kimi daha mürəkkəb məhsullara da şamil olunur.”

Almaniya Maşınqayırma Sənayesi Assosiasiyasının (VDMA) prezidenti Bertram Kavlat Avropa Komissiyasının sədri Ursula fon der Lyayenə göndərdiyi məktubda bu sektoru "varlıq böhranı" ilə üz-üzə qaldığını bildirib. Onun sözlərinə görə, hazırda Aİ-dən ABŞ-a ixrac edilən avadanlıqların təxminən 30%-i məhsulun tərkibindəki metal səbəbindən 50%-lik rüsumlara məruz qalır.

Razılaşmaya qarşı narazılıq Avropa Parlamentində də yayılmağa başlayıb. Bu isə sənədin əsas müddəalarının qüvvəyə minməsi üçün parlamentin razılığını sual altına alır. Parlamentin ticarət komitəsinə sədrlik edən alman siyasətçi Bernd Lange bildirib ki, deputatlar iyul razılaşmasına uyğun olaraq ABŞ-dan idxal olunan bəzi məhsullara tətbiq edilən rüsumların ya ləğvini, ya da azaldılmasını tələb edə bilərlər.

“Avropa istehsalçıları artıq yalnız 15% deyil, həm də əlavə polad və alüminium rüsumları ödəməli olduqları halda, Aİ niyə ABŞ-dan gətirilən motosikletlərə sıfır rüsum tətbiq etməlidir?” – deyə Lange vurğulayıb.

---