AMB milli ödəniş infrastrukturunun beynəlxalq inteqrasiya perspektivlərini araşdırır

Azərbaycan Mərkəzi Bankı (AMB) ölkənin milli ödəniş infrastrukturunun beynəlxalq inteqrasiya perspektivlərini dəyərləndirir.

FinFly AMB-yə istinadən xəbər verir ki, bunu qurumun ödəniş xidmətləri və ödəniş sistemləri üzrə fəaliyyətə nəzarət və siyasət departamentinin direktoru Kəmalə Qurbanova Malayziyanın paytaxtı Kuala-Lumpurda keçirilmiş "Kollektiv güc: dəyişən dünyada dayanıqlılıq və inkişaf" adlı beynəlxalq tədbirdə çıxışı zamanı bildirib.

O, dəyişən qlobal şəraitdə birgə fəaliyyətin vacibliyini, ölkələrarası ödəniş əlaqələrinin formalaşdırılmasında daxili ödəniş infrastrukturunun rolunu, eləcə də beynəlxalq standartların tətbiqinin əhəmiyyətini vurğulayıb, Azərbaycanda milli ödəniş infrastrukturunun modernizasiya mərhələsinin müvəffəqiyyətlə başa çatdığını və hazırkı dövrdə beynəlxalq inteqrasiya imkanlarının strateji prioritet olaraq nəzərə alındığını qeyd edib.

Departament direktoru ölkədə ani ödəniş sisteminin genişləndirilməsi üzrə görülən son işlər, o cümlədən qanunvericilik bazasının yenilənməsi və vahid QR standartının həyata keçirilməsi haqqında ətraflı məlumat verib.

"Central Banking"in təşkil etdiyi forum mərkəzi banklar arasında təcrübə paylaşımı, beynəlxalq ödənişlərin real vaxt rejimində həyata keçirilməsi və maliyyə inklüzivliyinin artırılması məsələlərinin müzakirəsi baxımından əhəmiyyətli beynəlxalq platforma funksiyasını yerinə yetirib.

---