AYİB 2026-cı il üçün Azərbaycanın iqtisadi artımını proqnozlaşdırıb

Avropa Yenidənqurma və İnkişaf Bankı (EBDR) Azərbaycan iqtisadiyyatının 2025-ci ildə 2 faiz, 2026-cı ildə isə 2,5 faiz artacağını proqnozlaşdırır.

FinFly xəbər verir ki, bu proqnoz bankın sentyabr ayına olan "Regional iqtisadi perspektivlər" icmalında yer alıb.

Azərbaycanda 2025-ci il üçün ÜDM-in artım göstəricisi may proqnozu ilə müqayisədə 1 faiz bəndi aşağı salınıb, 2026-cı il üçün proqnoz isə dəyişməz qalıb.

"Azərbaycanda iqtisadi artım 2024-cü ildəki 4,1 faizdən 2025-ci ilin birinci yarısında illik 1,5 faizə qədər yavaşlayıb, belə ki, karbohidrogen hasilatı sektorunda azalma 3,1 faiz təşkil edib, qeyri-neft sektorunda isə fəallıq tikinti, ticarət və turizmin hesabına 3,8 faiz artıb", - icmalda qeyd olunur.

EBDR vurğulayır ki, 2025-ci ildə real ÜDM-in 2 faiz, 2026-cı ildə isə 2,5 faiz artacağı proqnozlaşdırılır, bu da qeyri-neft sektorundakı fəallıq və onun neft sektorundakı daha zəif göstəriciləri kompensasiya etməsi ilə əlaqədardır. "Enerji qiymətlərindəki dəyişkənlik, qlobal ticarətdəki qeyri-müəyyənlik və regional geosiyasət iqtisadi artımda yavaşlama riskləri yaradır. ÜDM-in artım potensialı Aİ ilə enerji sahəsində əməkdaşlıq, Orta Dəhlizin genişləndirilməsi, Ermənistanla sülh gündəliyi ilə bağlıdır ki, bu da yeni ticarət marşrutlarının açılmasına səbəb ola və investorların etimadını artıra bilər", - hesabatda qeyd olunur.

Şərqi Avropa və Qafqazda artım 2023-cü ildəki 4,7 faizdən 2024-cü ildə 3,9 faizə və 2025-ci ilin birinci yarısında 2 faizə qədər yavaşlayıb, belə ki, vasitəçi ticarətdən və Qafqaz iqtisadiyyatına işçi qüvvəsi və kapital axınından irəli gələn təkan zəifləyib. Regionda orta illik artımın 2025-ci ildə 3 faiz, 2026-cı ildə isə 4,4 faizə qədər sürətlənəcəyi gözlənilir.

---