Azərbaycan onlayn xidmətlər sahəsində inkişaf etməkdə olan ölkələrdən irəlidədir

Azərbaycan Elektron Hökumətin İnkişafı İndeksi üzrə onlayn xidmətlər sahəsində bir çox inkişaf etməkdə olan ölkələrdən öndədir.

FinFly xəbər verir ki, bunu Rəqəmsal İnkişaf və Nəqliyyat Nazirliyi yanında İnnovasiya və Rəqəmsal İnkişaf Agentliyinin sədri Fərid Osmanov deyib.

Onun sözlərinə görə, hazırda rəqəmsallaşma sahəsində reytinqlərin artırılması məqsədilə təkcə İnnovasiya və Rəqəmsal İnkişaf Agentliyi deyil, həm də bütün hökumət orqanları çox sıx işləyir.

"Biz qlobal reytinqləri artırmaq üçün ən yaxşı tədbirləri görməyə çalışırıq. Əvvəlki illərdən başlayaraq, biz nəhəng artıma nail olduq. Onlardan əsası keçən il elan edilmiş Elektron Hökumətin İnkişafı İndeksidir və Azərbaycan 9 mövqe yüksəlib və bu gün 74-cü yerdədir. İnanırıq ki, gələn il biz bu göstəricini artıracağıq. Bunun daxilində onlayn xidmətlər indeksi var. Onlayn xidmətlər indeksi üzrə biz indi 27-ci yerdəyik və bir çox inkişaf etməkdə olan ölkələrdən öndəyik. Biz bu siyahıda çox yüksək inkişaf etmiş qabaqcıl ölkələrin reytinqindəyik", - deyə bildirib.

O qeyd edib ki, hazırda dünyada rəqəmsal transformasiya çox sürətlə getdiyi üçün kibertəhlükəsizlik sahəsi də mühüm əhəmiyyət kəsb edir.

"Buna görə də Azərbaycan hökuməti kibertəhlükəsizliyə, məlumatların məxfiliyinə və bu istiqamətdə islahatlara böyük diqqət yetirir. Beləliklə, Milli Kibertəhlükəsizlik İndeksində biz 100 ölkə arasında 94-cü yerdəyik. Biz qabaqcıl ölkələr siyahısındayıq və bu günlərdə bizim üçün başqa bir çağırış Qlobal İnnovasiya İndeksidir. İnnovasiya indeksini artırmaq üçün bütün universitetlər və dövlət qurumları ilə birlikdə əlimizdən gələni edirik", - deyə, əlavə edib.

---