Azərbaycanda I rübdə 7 mln tona yaxın neft-kondensat hasil edilib

2025-ci ilin birinci rübündə, Azərbaycanda neft-kondensat hasilatı 6,9 milyon ton, ixracı isə 5,7 milyon ton olub.

FinFly xəbər verir ki, bunu energetika naziri Pərviz Şahbazov "X" sosial şəbəkəsində bildirib.

Nazir qeyd edib ki, ötən rüb 12,6 milyard kubmetr qaz hasil edilib. 6 milyard kubmetr qaz isə ixrac olunub.

Hazırda Azərbaycandan Bakı-Tbilisi-Ceyhan boru kəməri ilə "Azəri-Çıraq-Günəşli" yataqlar blokundan hasil edilən neft və "Şahdəniz" yatağından hasil edilən kondensat nəql olunur. Bundan əlavə, boru kəməri ilə Türkmənistan və Qazaxıstandan neft nəql edilir.

Təbii qaz həcmləri Cənubi Qafqaz Boru Kəməri (Bakı-Tbilisi-Ərzurum) və Trans-Anadolu Qaz Boru Kəməri (TANAP) vasitəsilə Türkiyə bazarına çatdırılır. Bakı-Tbilisi-Ərzurum kəməri ilə ilk qaz Türkiyə bazarına 2007-ci ildə daxil olub. TANAP vasitəsilə Türkiyəyə kommersiya qazının nəqlinə isə 2018-ci il iyunun 30-da başlanılıb. Türkiyəyə Azərbaycanın “Şahdəniz” yatağından hasil edilən təbii qaz nəql olunur.

---