DGK Azərbaycana idxalın kəskin artmasının səbəbini açıqladı

21 May, 2025 14:45

2025-ci ilin yanvar-aprel aylarında Azərbaycanın idxalının dəyərinin ötən ilin eyni dövrünə nisbətən 2 milyard 667,9 milyon ABŞ dolları və yaxud 48,8 faiz artması, bununla da xarici ticarətdəki müsbət saldonun illik müqayisədə 4,15 dəfə azalması ölkəyə gətirilən qeyri-monetar qızılla bağlıdır.

Dövlət Gömrük Komitəsindən (DGK) FinFly-a verilən məlumata görə, bu ilin 4 ayı ərzində Azərbaycana 2 milyard 527,3 milyon ABŞ dolları dəyərində qeyri-monetar qızıl idxal edilib ki, bu da 1 il əvvələ nisbətən 8,6 dəfə çoxdur.

"Qeyri-monetar qızılın idxalı nəzərə alınmadan ölkənin idxalının dəyəri 5 milyard 605,6 milyon ABŞ dolları (illik müqayisədə 8,4 faiz çox), xarici ticarətdə müsbət saldo isə 3 milyard 179,1 milyon ABŞ dolları (6,1 faiz çox) təşkil edib", - deyə, məlumatda qeyd edilib.