ABŞ-ın təkrar bazarında elektrik avtomobilləri benzin mühərrikli avtomobillərdən daha tez dəyərini itirir.
FinFly iSeeCars analitik platformasının yeni araşdırmasına istinadən xəbər verir ki, son bir ildə elektrik avtomobillərinin orta qiyməti 4,8 faiz ucuzlaşıb, benzinlə işləyən avtomobillər isə 5,2 faiz bahalaşıb.
Şirkətin məlumatına görə, bir ildən beş ilədək istifadə edilmiş elektrik avtomobilinin orta qiyməti 31 354 dollar təşkil edib ki, bu da bir il əvvəlkindən 1 569 dollar azdır. Müqayisə üçün qeyd edək ki, eyni yaşda benzinlə işləyən avtomobil orta hesabla 32 525 dollara başa gəlir - 2024-cü ilin iyun ayı ilə müqayisədə 1 594 dollar çoxdur.
"Təkrar bazarda alıcılar ilk növbədə yaxşı qiymət axtarırlar. Bu gün elektrik avtomobillər bu müqayisədə uduzurlar - onlar daha ucuzdur, lakin dəyərini daha tez itirirlər", - deyə, iSeeCars-ın baş analitiki Karl Brauer şərh edir.
Ən çox qiymət enişi olan modellər siyahısında elektrik avtomobilləri də üstünlük təşkil edir. Beləliklə, amortizasiyaya görə ilk üç yeri Tesla Model S, X və Y tutublar - ildə 15,8 faizə qədər. Model 3 və Porsche Taycan da ilk onluqda yer alıb.
Analitiklər elektrik avtomobillərin qiymətlərinin aşağı düşməsini təklifin çoxluğu və tələbin yavaşlaması ilə əlaqələndirirlər. 2024-cü ilin iyul ayından bazarda işlənmiş elektrik avtomobillərinin sayı 61,8 faiz, benzinlə işləyən avtomobillərin sayı isə cəmi 22,2 faiz artıb.
Vəziyyət 2025-ci il oktyabrın 1-dən ABŞ-da yeni və işlənmiş elektrik avtomobillərinin alınması üçün federal subsidiyaların başa çatacağından daha da pisləşə bilər. Ekspertlərin fikrincə, bu, elektrik avtomobillərin qiymətlərinin daha da aşağı düşməsinə və alıcıların marağının azalmasına səbəb ola bilər.
iSeeCars-ın 2025-ci ilin may ayına aid başqa bir araşdırmasına görə, işlənmiş Tesla avtomobilləri bir ildə ən çox ucuzlaşıb.
Son xəbərlər
-
18 Iyl, 2025Qızıl ucuzlaşıb...
