Özbəkistan Prezidenti Çində CNPC və CNBM ilə yeni investisiya layihələrini müzakirə edib

Özbəkistan prezidenti Şavkat Mirziyoyev Çinə rəsmi səfəri çərçivəsində Çinin aparıcı şirkətlərinin, o cümlədən Çin Milli Neft Korporasiyası (CNPC) və Çin Milli Tikinti Materialları (CNBM) şirkətlərinin rəhbərləri ilə görüşlər keçirib.

Bu barədə FinFly Özbəkistan prezidentinin mətbuat xidmətinə istinadən məlumat yayıb.

Tərəflər investisiya əməkdaşlığının perspektivlərini, o cümlədən energetika, geologiya, kənd təsərrüfatı, kimya və zərgərlik sənayesi, ictimai nəqliyyatın modernləşdirilməsi, infrastrukturun və turizmin inkişafı layihələrini müzakirə ediblər. Artıq 5 milyard dolları ötmüş CNPC investisiyalarına, eləcə də yeraltı təbii qaz anbarlarının tikintisi, infrastrukturun modernləşdirilməsi və innovativ həllərin tətbiqi üzrə birgə layihələr portfelinin genişləndirilməsi planlarına xüsusi diqqət yetirilib.

CNBM tərəfindən nasos stansiyalarının modernləşdirilməsi, günəş və külək elektrik stansiyalarının, enerji saxlama sistemlərinin tikintisi və alternativ enerji obyektləri üçün komponentlərin istehsalının lokallaşdırılması üzrə perspektiv layihələr müzakirə edilib. Əldə edilmiş razılaşmaların icrasını sürətləndirmək üçün ayrıca “yol xəritəsi”nin hazırlanması tapşırılıb.

Mirziyoyev Çin biznesinin Özbəkistana ənənəvi olaraq yüksək marağını qeyd edib. Təkcə ötən il investisiyaların həcmi 10 milyard dolları ötüb.

---