Qarabağda tikinti sahəsində daha bir şirkət fəaliyyət göstərəcək

İqtisadiyyat nazirliyi yanında iqtisadi zonaların inkişafı agentliyinin idarəçiliyində olan "Araz vadisi iqtisadi zonası" sənaye parkında boya fırçası və boya rulosu istehsal ediləcək.

FinFly agentliyə istinadən xəbər verir ki, "Desen MM" MMC-yə sənaye parkında rezidentlik verilib. Layihənin investisiya dəyəri 1,9 milyon manatdır.

Türkiyə və Çinin qabaqcıl texnologiyalarından istifadə ediləcək müəssisədə istehsal olunacaq məhsulların daxili bazara satışı ilə yanaşı, ixracı da həyata keçiriləcək.

Parkda hazırda 17 sahibkarlıq subyektinə rezidentlik, 3 sahibkara isə qeyri-rezidentlik statusu verilib. Belə ki, sahibkarlar parka 35 milyon manatdan çox investisiya yatırıb, 100-ə yaxın daimi iş yeri yaradıb.

---