Qazaxıstan Orta Dəhlizi sənayenin inkişafı platforması kimi görür

Qazaxıstan üçün Transxəzər Beynəlxalq Nəqliyyat Marşrutu (TİTR və ya Orta Dəhliz) sadəcə tranzit marşrutu deyil, sənayenin inkişafı, rəqəmsal inteqrasiya, beynəlxalq istehsal və logistika zəncirlərinin yaradılması üçün platformadır.

FinFly xəbər verir ki, bunu Qazaxıstanın xarici işlər nazirinin müavini Alibek Kuantırov Astana Beynəlxalq Forumu çərçivəsində deyib.

Onun sözlərinə görə, Qazaxıstan artıq Çinlə sərhədi və Xəzər dənizindəki limanları birləşdirən 3 500 kilometrdən çox əsas dəmir yolu infrastrukturunu təmin edir. Növbəti illərdə daşımaların həcminin 10 milyon tona çatdırılması planlaşdırılır ki, bu da qlobal təchizat zəncirlərinin iştirakçıları tərəfindən artan tələbi və Qazaxıstanın marşrutun imkanlarını artırmaq səylərini əks etdirir.

"Orta Dəhliz təkcə logistika marşrutu deyil, etimad, səmərəlilik və artım infrastrukturudur. Qazaxıstan inteqrasiyaya mərc edir - həm fiziki, həm də rəqəmsal. Biz real nəticələri görürük: 2024-cü ilin martında Siandan konteyner qatarı 11 günə Azərbaycana gəlib", - nazir müavini bildirib.

O, Qazaxıstanın infrastruktura - yeni dəmir yollarının tikintisinə, Aktau və Kurık limanlarının genişləndirilməsinə, beynəlxalq investorlarla əməkdaşlıqda konteyner qovşağının yaradılmasına 35 milyard dollardan çox investisiya yatırdığını diqqətə çatdırıb.

"Bizim vəzifəmiz təkcə tranzit deyil. Qazaxıstan Orta Dəhlizə sənaye artımı və qlobal təchizat zəncirlərinə davamlı inteqrasiya üçün platforma kimi baxır", - Kuantırov bildirib.

---