S&P 2025-ci ildə Azərbaycanda kreditləşmənin artacağını proqnozlaşdırır

“S&P Global” beynəlxalq reytinq agentliyi 2021-2024-cü illərdə orta illik 18 faiz artımdan sonra 2025-ci ildə Azərbaycanda kreditləşmənin 15 faiz artacağını gözləyir.

FinFly "S&P"yə istinadən xəbər verir ki, artımın əsas amili istehlak kreditləşməsinin aktiv şəkildə genişlənməsidir.

Agentlikdən qeyd edilib ki, tarixən Azərbaycanda kreditləşmə dinamikası neft qiymətləri ilə sıx korrelyasiya olub.

Yüksək artım templərinə baxmayaraq, özəl sektorun borc səviyyəsi müqayisə edilən ölkələr arasında ən aşağı olaraq qalır. “S&P”nin qiymətləndirməsinə görə, ev təsərrüfatlarının borcunun ÜDM-ə nisbəti 14 faiz, korporativ borcun nisbəti isə 10 faiz təşkil edir.

Qeyd edək ki, 2025-ci il martın 1-dən Azərbaycan Mərkəzi Bankı (AMB) 0,5 faiz həddində əlavə kontr-tsiklik kapital buferi tətbiq edəcək. Kontr-tsiklik buferin aktivləşdirilməsi qərarı müvafiq qaydalara uyğun olaraq əsasən kredit kəsirinin göstəricisinin (kreditin ÜDM-ə nisbətinin uzunmüddətli tendensiyadan kənarlaşması) 2 faiz-i üstələməsi nəzərə alınaraq qəbul olunub.

2025-ci il yanvarın 1-nə Azərbaycan iqtisadiyyatına kredit qoyuluşlarının həcmi 29,288 milyard manat təşkil edib ki, bu da ötən ilin dekabrının əvvəli ilə müqayisədə 0,8 faiz, 2024-cü ilin əvvəli ilə müqayisədə isə 22,1 faiz artım deməkdir.

---