Sadır Japarov Xankəndidə İƏT sammitində iştirak edəcək

İyulun 3-də Qırğızıstan Prezidenti Sadır Japarov İqtisadi Əməkdaşlıq Təşkilatının (İƏT) Xankəndidə keçiriləcək 17-ci sammitində iştirak etmək üçün Azərbaycana ikigünlük işgüzar səfər edəcək.

FinFly-nin Qırğızıstan KİV-nə istinadən verdiyi məlumata görə, bu barədə prezident administrasiyasının xarici siyasət şöbəsinin rəhbəri Saqinbek Abdumutalip deyib.

Sammitin mövzusu "Etibarlı və İqlimə Dayanıqlı Gələcək üçün İƏT-ə yeni baxış"-dır.

"Tərəflər təşkilatın gündəliyindəki cari məsələləri, o cümlədən iqlim dəyişikliyinin qarşısının alınması üçün üzv dövlətlərin gördüyü tədbirləri müzakirə edəcəklər", - Abdumutalip qeyd edib.

Japarovun səfəri zamanı Qırğızıstan tərəfi tərəfindən Ağdam rayonunda inşa edilmiş "Aykol Manas" məktəbinin rəsmi açılışı da baş tutacaq.

---